Pakikipag-usap sa Pamilya at mga Kaibigan

Ang pagbibigay-alam sa iba na ikaw ay mayroong kanser ay makaluluwag nang husto sa iyong kalooban kaysa mag-imbento ng kung anu-anong paliwanag o di-kaya’y ilihim ang iyong kalagayan. Maaaring makatuklas ka ng di-inaasahang pagtataguyod at pag-unawa mula sa iba, kasama na ang mga taong dumaan rin sa isang karamdamang mapanganib sa buhay.

Narito ang sampung mungkahi sa pakikipag-usap sa iyong mga kaibigan at pamilya:

• Maging tapat. Linawin mo kung ano ang maaaring gawin ng iba upang matulungan ka.
• Huwag mong akalain na alam na ng iba kung ano ang kailangan mo o di-kaya’y alam na nila ang tamang gagawin.
• Kung hindi mo nais na mayroong kasama, pasalamatan mo ang kanilang pag-aalala at sabihin na lamang na nanaisin mo sanang dumalaw na lang sila sa ibang panahon kung kailan mabuti na ang iyong pakiramdam.
• May mga taong mas kayang dalhin ang panganib kaysa sa iba. Karamihan sa mga tao ay tunay magmahal ngunit hindi lamang alam ang dapat sabihin o gawin. Tanggapin mo ang kanilang mga pagkukulang.
• Kung nais mo lamang na may kasama o di kaya’y nais mo lamang na mayroong nakikinig sa iyong karaingan, sabihin mo. Ipaliwanag mo sa kanila na hindi ka umaasa ng kasagutan o kalutasan kundi nais mo lamang na pakinggan nila ang iyong mga karaingan.
• Maaaring sa pagharap ng kanser sa suso ay lumabas ang mga suliraning wala namang kinalaman sa kanser tulad ng pagkawalang tiwala sa isa’t isa o di kaya’y ang kakulangan ng pag-uusap. Kapag nalalaman mo ang mga ito, madali mong mababago ang iyong mga dating kagawian habang inaalam mo ang kasalukuyang matinding relasyon.
• Maaaring kahit maaalahaning pamilya at mga kaibigan mo ay mainip sa pag-aantay ng iyong pag-galing. Tandaan mo na ikaw ay nakaligtas sa isang mahirap na bagay. Huwag mong bayaan na ikaw ay mapuwersa nila at tuloy mapabayaan mo ang iyong sariling damdamin.
• Hayaan mo ang iyong sarili na alamin ang iba’t ibang pamamaraan na mapabuti ang iyong kalusugan at pagpapahalaga sa sarili. Ipako mo ang iyong pag-iisip sa pagkakaroon ng isang matibay na pagkatao at hangaring makaligtas sa iyong mga paggagamot.
• Maaari kang maging abalang-abala sa iyong kanser hanggang sa manatili sa iyo ang mga damdaming makakasagabal na lamang sa iyong pag-papagaling. Lumapit ka sa mga grupong nagtataguyod o di kaya’y sa isang therapist upang magkaroon ka ng lakas ng loob sa pagsulong mo sa iyong mga hinaharap.
• Samantalang hindi mo tungkulin ang intindihin ang damdamin ng iba, tandaan mong sila rin ay nagsisikap kayanin ang iyong kalagayan.

Email This Page: